كیڈٹس كالج پٹارو صوبہ سندھ
یہ كیڈٹس كالج پٹارو چھائونی صوبہ سندھ میں قائم كیا گیا ۔یہ كالج حیدرآباد سے اٹھارہ میل كے فاصلے پر واقع ہے ۔اس كالج میں داخلہ ساتویں اور آٹھویں دونوں كلاسوں میں دیا جاتا ہے ۔ساتویں كلاس میں داخلے كے لیے امیدوار كا چھٹی جماعت میں پاس ہونا یا چھٹی جماعت میں زیرتعلیم ہونا ضروری ہے ۔ساتویں جماعت میں داخلے كے لیے عمر كی حد گیارہ سال سے ساڑھے تیرہ سال ہے۔آٹھویں كلاس میں داخلے كے لیے ساتویں جماعت پاس ہونا یا ساتویں جماعت میں زیر تعلیم ہونا ضروری ہے ۔آٹھویں جماعت كے لیے عمر كی حد بارہ سے ساڑھے چودہ سال ہے۔
داخلے كی اہلیت
اس كالج میں داخلہ صوبہ سندھ كا ڈومیسائل ركھنے والے امیدواروں كو دیا جاتا ہے۔اس كے علاوہ مسلح افواج میں ملازم یا ریٹائرڈ افراد كے بچوں كو بھی اوپن میریٹ پر داخلہ دیا جاتا ہے۔آٹھویں كلاس میں ان لڑكوں كو داخلہ دیا جاتا ہے جن كے والدین كا تعلق سندھ شہری یا سندھ دیہی علاقوں سے ہو یا ان كے تعلق فوج سے ہو جبكہ ساتویں كلاس میں داخلہ صرف ان امیدواروں كو دیا جاتا ہے جن كے والدین كا تعلق سندھ كے دیہی علاقوں سے ہو اور انہوں نے ابتدائی تعلیم ایسے سكولوں میں پائی ہو جو ضلعی ہیڈ كوارٹر سے باہر دیہی علاقوں میں واقع ہوں ۔
اخراجات
اس كالج میں بھی تمام اخراجات والدین كو برداشت كرنے پڑتے ہیں ۔اس كے اخراجات بھی دیگر كیڈٹس كالجوں كے لگ بھگ ہی ہوتے ہیں ۔